हमहुँ छी मानव, ऐ समाजक,
त्याज्य औ नहि कोनो काजक ।
सामाजक बिषमताक जहर पिबैत,
सजाय भोगैत छी, दीर्घकालक ।।१।।
हमहुँ छी मानव, ऐ समाजक ।
मनुख थीक सामाजिक प्राणी,
लिखल भरल मानव इतिहास ।
मनुख मनुख बीच भेद बिषम,
भेल अछि शत्रुतापूर्ण सहवास ।।२।।
के छथि समाज केर विभाजक ?
हमहुँ छी मानव, ऐ समाजक ।
सम्पन्न, विपन्नक बैरभाव में,
आहत अछि, मानव जीवन ।
मानव भयभीत अछि मानव सँ,
त्राहि त्राहि करैत जन जीवन ।।३।।
ई भेद मनुख में कोन काजक ?
हमहुँ छी मानव, ऐ समाजक ।
सम्पन्नताक अहंकारक शिकार,
एकटा निर्धन, असहाय मानव ।
मानव दम्भ के बलि चढि गेल,
मानवीय गुण के कि बखानव ।।४।।
पुनरावृति छी जंगल राजक ।
हमहुँ छी मानव, ऐ समाजक ।
जाति बाँटल, पाति बाँटल,
उँच नीच के भेद पसारल ।
मानव के नैसर्गिक एकता ?
नहि धुअल, नहि पखारल ।।५।।
एकता अछि कोनो काजक ?
हमहुँ छी मानव, ऐ समाजक ।
सुविधा सम्पन्न उच्च अट्टालिका,
वैभव रक्षा हेतु नियुक्त द्वारपाल ।
कवच कुण्डलयुक्त, ऐ जीवन के,
वर्गभेद कहि या कोनो कमाल ?।६।।
नहि रहल अछि कोनो काजक ।
हमहुँ छी मानव, ऐ समाजक ।
प्राकृतिक रुप सँ मानव में,
नहि कोनो शत्रुता नहि भेद ।
अवसर पावि श्रेष्ठता आयल,
अवसरहीन के भेटल विभेद ।।७।।
कि एकरे मानू सम्बन्ध विभाजक ?
हमहुँ छी मानव, ऐ समाजक ।
श्रेष्ठता, दम्भ, अहंकार, उन्माद,
नहि मानवताक गुणक संस्कार ।
मेटा गेल अछि सबहक अस्तित्व,
पृथ्वी पर छल जकर अधिकार ।।८।।
ई सब तत्व छी सम्बन्ध नाशक ।
हमहुँ छी मानव, ऐ समाजक ।
(२०४८ भाद्र १६ गते, फत्तेपुर ८, बलार्दह ,सप्तरी)
